ཟུར་བརྗོད། འདི་རྒྱང་བསྒྲགས་ཀྱི་ སྲུང་ཤོག་འབྲིསཐངས་ཀྱི་ལམ་སྟོན་ ཡོངས་རྫོགས་མེན། ཨིན་རུང་ འདི་གིས་ཞིབ་བརྟག་རྒྱང་བསྒྲགས་ཀྱི་དོན་ལུ་ བློ་སླབ་ཐངས་དང་ འགྲེལ་བཤད་རྐྱབ་ཐངས་ཀྱི་ བསླབ་བྱ་ཚུ་བྱིནམ་ཨིན།
རྒྱང་བསྒྲགས་ཀྱི་གནས་ཚུལ་ཚུ་གེ་ར་ནང་ གློག་བརྙན་དང ་སྒྲ་བཟུང་ཚུ་ཡོདཔ་ཨིན། པར་དང་སྒྲ་བཟུང་ཚུ་ལས་ སྐབས་དོན་གྱི་གནས་སྟངས་དང་བསྟུན་ གནས་ཚུལ་ལེ་ཤ་འཐོན་འོང་། གསལ་བཤད་འདི་ གཙོ་བོ་ར་ གནས་ཚུལ་ལེགས་ཤོམ་སྦེ་ མི་མང་ལུ་ གོ་བརྡ་སྤྲོད་ནིའི་དོན་ལུ་ཨིན།
རིག་རྩལ་དང་ལྡན་པའི་ རྩོམ་བྲིས་ཅིག་གིས་ བལྟ་མི་ཚུ་གི་སྣང་བར་ ཐ་ན་ རྙིང་དུས་ཀྱི་རི་མོ་དང་ ཡིད་སུན་ཁག་ཁ་གི་ གནས་ཚུལ་ཚུ་ལུ་ཡང་ ཚོར་སྣང་གསརཔ་ བྱིན་ཚུགསཔ་བཟོ་འོང་། རྒྱང་བསྒྲངས་རེ་ཌི་ཡོ་གི་ དོན་ལུ་ཨིན་པ་ཅིན་ སྲུང་ཤོག་ཚུ་ གནས་ཚུལ་བཤད་མིའི་ བློ་དང་གཅིག་ཁར་སྦེ་ བཀོད་སྒྲིག་འབད་བ་ཅིན་ སྐབས་དོན་འདི་ ཧེང་སྐལ་ར་ ནུས་པ་ཅན་ལུ་འགྱུར་འོང་། དེ་འབདཝ་ད་ རྒྱང་མཐོང་ཨིན་པ་ཅིན་ གནས་ཚུལ་གྱི་བརྒྱ་ཆ་ ༨༥ དེ་ཅིག་ གློག་བརྙན་གྱིས་ དབང་དོ་ཡོདཔ་ཨིན། རྩོམ་བྲིས་ལེགས་ཤོམ་ཡོད་རུང་ འདི་གིས་ དབང་པོ་ངལ་སི་སི་གི་ གློག་བརྙན་དང་ ལུང་འདྲེན་འདི་གི་ སྐྱོན་སུབ་རྐྱབ་མི་ཚུགས། ག་ཅི་སྦེ་ཟེར་བ་ཅིན་ མི་ཚུ་གིས་ གློག་བརྙན་འདི་ལེགས་ཤོམ་མེད་པ་ཅིན་ བལྟ་མི་བཏུབ། གནས་སྟངས་གཉིས་ཆ་རའི་ནང་ པར་དང་ སྒྲ་གཟུང་ཡོད་པའི་ བློ་ཚུ་དང་འཁྲིལ་ ཁྲབ་སྲུང་བརྩམ་དགོ། འདི་ལུ་ “རྣམ་ཅོ་གི་དོན་ལུ་རྩོམ་བྲིས” ཡང་ན་ “པར་གྱི་དོན་ལུ་རྩོམ་བྲིས་” ཟེར་སླབ་ཨིན།
ཁྱོད་ཀྱིས་པར་ཆས་ནང་བཏབ་ཡོད་པའི་ དངོས་ཡོད་གནས་ཚུལ་འདི་གིས་ འགོ་བཙུགས་དགོ། དེ་ལས་ཁྱོད་ར་གིས་ གདམ་ཁ་རྐྱབ་ཡོད་པའི་ ཚིག་ཚུ་བཙུགས་ཏེ་ གསལ་བཤད་འགོ་བཙུགས་དགོ། འདི་གི་ཤུལ་ལས།
- ༡. གནས་ཚུལ་ལུ་ ཁག་ཆེ་བའི་ཁྱད་ཆོས་ཚུ་ལུ་ གཤམ་ཐིག་བཀོད་དགོ
- ༢. པར་དང་ གནས་ཚུལ་ ལ་ལུ་ཅིག་ལུ་ ཁྱད་ཆོས་ཚངམ་མེད་ས་ལུ་ ཤོ་སྙོམས་སྦེ་བཟོ་དགོ
- ༣. ལྟ་མི་ཚུ་གི་སེམས་ཁར་ ངེས་དགོ་པའི་གནས་ཚུལ་ཚུ་ གདམ་ཁ་རྐྱབ་སྟེ་ གཙོ་བོརབཏོན་དགོ
- ༤. པར་མ་འདྲཝ་དང་ གནས་ཚུལ་མ་འདྲཝ་ཚུ་ འབྲེལ་མཐུད་འབད་དེ་ དུས་ཀྱི་འཕོ་འགྱུར་དང་བསྟུན་ འགྱུར་བ་ཚུ་བཤད་དགོ
- ༥. པར་དང་གནས་ཚུལ་འདི་ཚུ་ སྐབས་དོན་དང་མཐུནམ་སྦེ་བཟོ་དགོ
- ༦. པར་དང་གནས་ཚུལ་ཚུ་ལུ་ འགྲེལ་བཤད་དང་ དོན་དག་ཐེབས་བཙུགས་ཏེ་ བསྒྱུར་བ་བཟོ་དགོ། (དེ་འབདཝ་ད་ བརྡ་དོན་ངོ་མ་ལུ་ ཐོ་ཕོག་ནི་དང་ སྐབས་དོན་གྱི་ཕྱི་ཁར་ བཏོན་གཏང་ནི་མི་འོང་)
གནས་ཚུལ་བསྡུ་བཀོདཔ་གིས་ གཙོ་རིམ་འདི་ཚུ་གི་ཐོག་ལུ་ འབད་བརྩོན་བསྐྱེད་དགོ། དེ་འབདཝ་དང་ འདི་གིས་ ཁོ/མོ་ ག་ར་ཨིན་རུང་ ཨ་རྟག་ར་ གནས་ཚུལ་དང་ ལྟ་མི་གཉིས་ཀྱི་བར་ནའི་ བར་མི་བཟུམ་སྦེ་ བཀག་རྐྱབ་མི་དང་ ཡང་ན་ ཕྱི་སེལ་རྐྱབ་མི་ འབད་དགོ་ཟེར་བའི་ ལོ་རྒྱུས་མིན། ཁྱོད་ཀྱི་གནས་ཚུལ་གི་ཐོག་ལུ མི་ཚུ་གིས་ འབྲེལ་བ་ཡོད་པའི་ ལོ་རྒྱུས་རེ་ སླབ་ཡོད་པ་ཅིན་ འདི་ཚུ་གནས་ཚུལ་བསྡུ་བཀོད་པའི་ ཚིག་འགྲེལ་གྱི་ཚབ་སྦེ་ བཙུགས་དགོ། རྒྱང་བསྒྲགས་དང་ གསར་ཤོག་གཉིས་ཀྱི་ཁྱད་པར་ཚུ་ གཤམ་གསལ་ལྟར་དུ་ཨིན།
| གསར་ཤོག་ | རྒྱང་བསྒྲགས། |
|---|---|
| གལ་ སྲིད་མི་ཚུ་གིས་ ཧ་མ་གོ་བ་ཅིན་ ནམ་ར་ཨིན་རུང་ ལོག་བལྟ་བཏུབ། | རྒྱང་བསྒྲགས་འདི་ ཡུདཔ་ཐེངས་ཅིག་འཐོན་ཏེ་ ལྟ་མི་ཚུ་གི་མིག་ཁ་ལས་ ཡལ་འགྱོཝ་ཨིན། ལྟ་མི་ཚུ་གིས་ འཆར་སྣང་རྐྱངམ་གཅིག་ལས་བརྒལ་ ཁ་གསལ་དྲན་མི་ཚུགས། དེ་འབདཝ་ལས་ ཆ་ཤས་གེ་ར་གལ་ཆེ། |
| འཛོལ་བ་འདི་ཚུ་ གསལ་རིལ་རི་སྦེ་ ཤོག་ཀུ་ཐོག་ལུ་སྡོད་འོང་། | ལྟ་མི་ཚུ་གིས་ འཛོལ་བ་ཚུ་ ཐེངས་གཅིག་ ཡང་ན་ ཐེངས་གཅིག་ཡང་མི་མཐོང་། |
| འདི་ནང་ཤོག་ལེབ་ཚུ་ འཚོལ་ནིའི་དོན་ལུ་ - མགུ་རྒྱན། ཁ་ཡིག ཡི་གུའི་དོན་མཚམས། ལ་སོགས་པའི་ ལམ་བརྡ་འོང་། | རྒྱང་བསྒྲགས་ལས་རིམ་ བར་ན་ལྷོདཔ་ད་ བལྟ་བ་ཅིན་ ག་ཅི་གི་ལས་རིམ་ཨིན་ན་ ཧ་གོ་མི་ཚུགས། |
| ལྷག་མི་ཚུ་གིས་ ལྷག་ནི་མཚམས་བཞག་སྟེ་ ལཱ་སོ་སོ་ཅིག་འབད་བར་སོང་སྟེ་ ལོག་འོངས་ཞིན་ན་ བཞག་མཚམས་དེ་ལས་ ཚིག་གཅིག་ཡང་མ་ཆད་པར་ འཕྲོ་མཐུད་དེ་ ལྷག་ཚུགས། | གལ་སྲིད་ ལས་རིམ་འདི་ སྒྲ་བཟུང་སྟེ་ བཞག་བཞགཔ་དང་ ཡོངས་འབྲེལ་ཐོག་ལུ་ཡོད་པ་ཅིན་རྐྱངམ་གཅིག་ བལྟ་འཕྲོ་བཞག་སྟེ་ ལཱ་གཞན་འབད་བར་འགྱོ་ཚུགས། |
| པར་རིགས་དང་ བརྒྱུད་ལམ་སྣ་ཚོགས་ཡོད་པ་ཅིན་ གནས་ཚུལ་ལུ་ བརྩི་མཐོང་ཐེབས་བསྐྱེད་འོང་། ཡོངས་འབྲེལ་ཐོག་གི་ གསལ་སྟོན་འདི་ཚུ་གིས་ ལྷག་མི་གི་ ཡིད་ཆེས་འཐོབ་ནིའི་དོན་ལུ་ ཐབས་ལམ་འདི་ཚུ་ ལག་ལེན་འཐབ་ཨིན། | རྒྱང་བསྒྲགས་ཐོག་གི་ གནས་ཚུལ་གྱིས་ ལྟ་མི་ཚུ་ལུ་ གནས་ཚུལ་གྱི་སྒྲུབ་བྱེད་ (དཔེར་ན་ སྒྲ་དང་ པར་རིགས) ཚུ་སྟོནམ་ཨིན། འདི་ཚུ་གིས་ རྒྱང་བསྒྲགས་ཀྱི་བརྩི་མཐོང་ རྒྱ་བསྐྱེད་གཏངམ་ཨིན། (འདི་བདེན་པ་འོང་ནི་ཨིན་པས། ང་གིས་རྒྱང་མཐོང་ནང་མཐོང་ཅི) ཟེར་དོ་བཟུམ། འདི་བཟུམ་སྦེ་ བདེན་པ་ཚུ་ཡང་ བསྒྱུར་གཏང་ནིའི་ནུས་པ་ སྦོམ་ཡོདཔ་ཨིན། |
| ལྷག་ནི་འདི་ དུས་ཡུན་འགོར་རུང་ ལྷག་མི་འདི་གིས་ བརྡ་དོན་ཁ་གསལ་འཐོབ་ཨིན། | རྒྱང་བསྒྲགས་གནས་ཚུལ་གྱི་དོན་ལུ་ འབྲི་ལྷག་གི་ཤེས་ཚད་སྦོམ་སྦེ་ དགོཔ་མེད་རུང་ སྣ་ཁ་མང་བ་དང་ ཡུད་ཙམ་ཅིག་ གནས་པའི་ ལས་རིམ་གྱི་གོ་བ་ ལེན་ནིའི་དོན་ལུ་ སྤྱིར་བཏང་གི་ཡོན་ཏན་དགོ། |
རྒྱང་བསྒྲགས་ཀྱི་གནས་ཚུལ་ཚུ་ སྒྲ་གདངས་ (podcast) བཟུམ་སྦེ་ སྒྲ་བཟུང་སྟེ་བཞག་ན་མ་གཏོགས་ གསར་ཤོག་བཟུམ་ ལག་བཟུང་བཏུབ་པའི་ དངོས་པོ་མེན།
རྒྱུ་མཚན་འདི་ཚུ་ལུ་བརྟེན་ཏེ་ རྒྱང་བསྒྲགས་ཀྱི་རང་བཞིན་དང་ མི་མང་གིས་ ལག་ལེན་འཐབ་ཐངས་ལུ་བལྟཝ་ད་ གསར་ཤོག་ལས་སྡེ་ནང་ལུ་ ལཱ་འབད་མི་དང་འཕྱདཔ་ད་ རྒྱང་བསྒྲགས་སྲུང་ཤོག་གི་དོན་ལུ་ སྐད་ཡིག་གི་ཐབས་ལམ་ གནམ་མེད་ས་མེད་ མ་འདྲཝ་སྦེ་ ཡོད་དགོཔ་ཨིན། བརྒྱུད་ལམ་ག་ཅི་ཨིན་རུང་འདྲ་ དུས་ཚོད་དང་ ས་གོ་ ཚད་གཅིག་ལས་མེད་པའི་ གནས་སྟངས་ནང་ གནས་ཚུལ་ཚད་མེདཔ་ཅིག་ སྤེལ་ནི་ལུ་ ག་ཐོབ་རྐྱབ་དོ་ཡོདཔ་ཨིན། མི་མང་གི་སེམས་ འདི་འཕྲོ་ལས་ མགུ་ཚུགས་པའི་ གནས་ཚུལ་ཅིག་ ཡང་ན་ གནས་སྐབས་ཅིག་འཚོལ་ཏེ་ ཞིབ་བརྟག་གི་ལས་འགུལ་ འགོ་བཙུགས་ནི་ལུ་ བརྩོན་དགོཔ་ཨིན་ནོ།། །།