स्टोरीको उद्देश्य अथवा परिस्थितिका आधारमा आफूले कुराकानी गर्न चाहेका, आफूले स्टोरी गरिराखेका विषयमा बताउन सक्ने मानिसलाई जहाँ भेट्यो त्यहीं (यसो गर्नुलाई असभ्य काम मानिन्छ) अथवा फोनमा कुराकानी गर्न पनि सकिन्छ । कुनै स्रोतले कुराकानी गर्न लगातार बाधा उत्पन्न गरिराख्यो भने उसलाई पिछा गरेर भेट्नुपर्ने हुनसक्छ । उसको अफिस, उसको कोठा अथवा ऊ कुन सार्वजनिक कार्यक्रममा जान्छ त्यहीं उसलाई ढुकेर बस्न सकिन्छ । यसो गर्दा आफैंलाई हानि हुन पनि सक्छ । त्यसैले उसलाई जालमा पारेजस्तो गर्नु भने हुँदैन । नरम भएर उसलाई आफ्नो परिचय दिनुपर्छ र आफूले उसँग कुराकानी गर्न चाहेको बताउनुपर्छ । उसले तपाईंलाई शंका ग¥यो भने उसले पत्याएका मानिसबाट भनसुन गराउनुपर्ने पनि हुन्छ । कुनै कम्पनी, संस्था, सरकारी वा अर्धसरकारी निकायका मानिससँग अन्तर्वार्ता लिनका लागि उनीहरूका प्रवक्तामार्फत औपचारिक बाटो लिनुपर्ने पनि हुनसक्छ । जे जस्तो अवस्थामा अन्तर्वार्ता लिनुपर्ने भए पनि आफू शिष्ट हुनुपर्छ ।

अन्तर्वार्ता लिन चाहेको व्यक्तिलाई भेट्नु वा फोन गर्नुभन्दा पहिले आफूले सोध्न चाहेका सबै मुख्य बुँदा छोटकरीमा बताउन अभ्यास गर्दा राम्रो हुन्छ । उसलाई आफू पत्रकार हुँ भनेर कति वेला बताउने भन्ने कुरा पनि यतिवेला सोच्नुपर्छ । कुन अवस्थामा आफूलाई पत्रकार नभई अरू नै कुनै पेशाको मान्छे भनी आफ्नो भेष लुकाउने (आफूलाई सेल्स एजेन्ट वा अरू कोही भएको बताउने) ? यसो गर्दा आफूले धारण गरेको छद्म पेशामा आफू कसरी विश्वसनीय ढंगले प्रस्तुत हुने ?